Pozarren adierazten dizuegu 2022-2023 denboraldiaren 12. egitarau honetan BOSen bi musikari berri izango ditugula:
Patricia Ruíz, xirula bakarlaria
Rubén Ferreira, fagota-kontrafagota
Energia berria ekarriko diote gure orkestrari. Arrakasta handia opa diegu BOSekin hasiko duten etapa berri honetan.
Gaur, urtarrilaren 13an, Sabino Arana Fundazioak jakinarazi du nortzuk izango diren Sabino Arana Sariak 2022 jasotzeko hautatu dituzten pertsonak eta erakundeak. Sarituen artean dago Bilbao Orkestra Sinfonikoa, orkestraren mendeurrenaren urtean hain zuzen ere.
Oso harro gaude sari hau jaso izanaz eta hautatuak izan diren pertsona eta erakunde garrantzitsuekin sari hori partekatzeaz:
‘Irulegiko Eskua’ aurkitu zuen arkeologia lantaldea
ARANZADI Zientzia Elkarteko Mattin Aiestaran buru duen ikertzaile-taldeak ondo baino hobeto erakutsi digu buru-belarri lan eginda, landa eta laborategiko lan neketsuak fruitu joriak ematen dituela.
Irakli Kobakhidze
Georgiako Parlamentuan gehiengoa daukan ქართული ოცნება / Georgian Dream alderdiaren buru eta Kaukasoko herrialde horretan indarrean dagoen egungo konstituzioaren sortzaileetakoa izan zen. Egun, Europako hego-ekialdeko errepublika demokratiko horretan agintean dagoen alderdiaren buru da eta herrialdeak aurrerapauso garrantzitsuak eman ditu azken urteotan Europar Batasunean sartzeko bidean. Asmo zuzena eta beharrezkoa.
Mikel Sánchez Álvarez
Aitzindaria da Europan kirurgia artroskopikoaren esparruan, eta munduko lehen medikua dugu plaketez joriko plasmaren (PRP edo Platelet-rich plasma) ahalmena ulertzen eta traumatologian aplikatzen. Mikelek egindako #ikerketa- eta medikuntza-lanari esker, hobekuntza izugarriak aplikatu dira teknika kirurgikoetan eta ehunen birsorkuntzaren eremuan.
Aspace Gipuzkoa
Haien kemena eta eginahala balekoak izan dira garun-paralisiak jotako gipuzkoarren hainbat belaunalditako kidek gizartean parte hartzeko eta ikusarazteko beharrezko tresnak eta laguntza aurki ditzaten.
BOS Bilbao Orkestra Sinfonikoa
1922ko martxoaren 8tik, BOS Bilboko eta Euskadiko kultura-politikaren eragile eta tresna bihurtu da mundu osoan.
Euskadi-Ukraina elkartasun mugimendua
Hain zailak diren une hauetan, Sabino Arana Fundazioak aitortu eta saritu nahi du Ukrainako herria pairatzen ari den egoera lazgarriaren aurrean euskal gizartea erakusten ari den justizia, elkartasun eta harrera balioekiko konpromiso sendoa.
Sari honek amaiera ematen dio 2022. urte apartari, hain zuzen ere, Bilboko, Bizkaiko eta Euskadiko kultura erakunde gisa gure bizitzaren lehen ehun urteak ospatu ditugun urtea.
Eskerrik asko!!!
Gaurkoan oso harro eta esker oneko sentitzen gara.
Bilboko Udalak, BOSen patronatuko kideak, «Hiriko Enbaxadore» izendatu gaitu. Gure mendeurrenaren urtean, ez diogu albiste onak jasotzeari uzten.
Eskerrik asko!
Hauxe adierazi du Bilboko Udalak:
Juan Mari Aburto Alkateak ezagutzera eman ditu “Bilboko 2022ko Ospetsuak”: Daniel Innerarity, Iraia Iturregi, Adolfo Arejita eta Susana Rodriguez. Gainera, Hiriaren 2022ko Enbaxadore izendatu du Bilbao Orkestra Sinfonikoa (BOS), joan den martxoan lehen mendeurrena ospatu zuena.
Bilboko Hiriaren Enbaxadorea 2022: Bilbao Orkestra Sinfonikoa (BOS):
“Bere mendeurrenean, Bilboko izena munduan zehar profesionaltasun eta kalitate handiz eramateagatik, Musikak pertsonak batzen gaituela eta bihotzak partitura ederren erritmoan taupadarazten dituela erakutsiz”.
“Bilboko Ospetsuen” zerrendan, 115 izen daude orain arte: musikariak, abeslariak, konpositoreak, historialarik, idazleak, sukaldariak, aktoreak, enpresak, enpresa-zuzendariak, ikastetxeak, zinema-zuzendariak, modako profesionalak, artistak, jatetxeak… Zerrenda honen barruan, Hiriaren hiru Enbaxadore ere nabarmendu behar dira: Athletic Club (2012), Guggenheim Bilbao Museoa (2017) eta Bilbao Orkestra Sinfonikoa (2022).
Udalaren informazio osoa: https://labur.eus/yAWPU
Iwona Przyleckak, biolinen lerroko kideak, eta Piotr Borutak, biolen lerrokoak, erretiroa hartu dute 39 urtez BOSen parte izan ondoren.
Zorterik onen opa diegu hasi berri duten etapa berri honetan, eta bihotz-bihotzez eskertzen diegu ia lau hamarkada hauetan egindako lana, barruan zuten onena eman baitute orkestra hazten laguntzeko.
Datorren asteazkenean, martxoaren 9an, zozketatuko den kupoiak Bilbao Orkestra Sinfonikoa izango du protagonista, eta ONCEren 5,5 milioi kupoitan agertuko da estatu osoan, erakunde sinfoniakoaren sorreraren mendurrenarekin bat eginik.
Kupoiaren xehetasunak Juan Carlos Andueza ONCEren Euskadiko Lurralde Ordezkariak; Usue Vallejo ONCEren Euskadiko eta Kantabriako Joko Buruak; Javier Martínez Pozuelo ONCEko agente saltzaileak eman dute ezagutzera. Eta haiekin batera Lorea Bilbao Bizkaiko Kultura Foru Diputatuak, eta Ibon Aranberri Bilbao Orkestra Sinfonikoaren zuzendari nagusiak.
Kupoia 1923ko argazki batek ilustratzen du, eta bertan Bilbao Orkestra Sinfonikoa osatu zuten lehen irakasleak ageri dira, Armand Marsicken gidaritzapean, Arriaga Antzokiko agertokira igota. Kupoia datorren asteazkenean, martxoaren 9an zozketatuko da beraz, Eguneroko kupoia denez, 1,5 euroan eskaintzen da, 35.000 euroko 55 sari bost zifratan. Beste 0,5 euroren truke, seriean ere jokatuz, hilean 3.000 euroko “paga” bat 25 urtez irabaztea eskaintzen du, 35.000 eurokoa.
ONCEk Euskadiko ekitaldirik esanguratsuenetako batzuk jasotzen eta islatzen jarraitzen du, eta herritarrek ONCEren jokoetan jartzen duten konfiantza eskertzen du; izan ere, horiei esker, EAEko erakundean afiliatuta dauden 3.400 pertsona itsu eta/edo ikusmen urria dutenek beharrezko prestazio sozial eta teknikoak jasotzen dituzte, erabat gizarteratzearen alde eginez.
Pandemiaren ondorioak gorabehera, saltzaileek, 2020ko konfinamenduan lan-jarduerarik gabe egon ondoren, ONCEren joko-produktuak eskaintzen jarraitu dute 2021ean, baita Euskadiko kale eta plazetan ere, eta era berean ekin diote urte berri honi ere.
ONCEren kupoiak erakundearen loteria sozial, seguru, arduratsu eta solidarioko produktuen parte dira; izan ere, diseinutik merkaturatu arte, kontrolik gabeko kontsumoak neutralizatzeko kontrolak ezartzen ditu, eta berariaz debekatzen du adingabeei saltzea edo kreditu bidez kontsumitzea, besteak beste. Erakundeak herritarrekiko erantzukizuna du, eta joko arduratsuko politika sustatzen du, Munduko Loteria Elkarteak eta Estatuko Loteria eta Totoen Europako Elkarteak definitutako ebaluazio- eta jarraipen-sistema zorrotzenekin.ONCEren kupoiak ONCEren 19.000 saltzaile inguruk merkaturatzen dituzte. Gainera, www.juegosonce.es webgunean eta baimendutako establezimendu laguntzaileetan eros daitezke.
100 urte musikaz blai
Bilbao Orkestra Sinfonikoak 1922ko martxoaren 8an eman zuen lehen kontzertua Arriaga Antzokian, Armand Marsicken gidaritzapean. Bizkaiko gizarte zibilaren beraren bultzadatik sortu zen. Lurralde horrekin harreman estua du, eta bertan egiten du bere jardueraren zatirik handiena.
Sortu zenetik, zuzendari titular izan ditu Armand Marsick, Vladimir Golschmann, Jesús Arámbarri, José Limantour, Antoine de Babier, Rafael Frühbeck de Burgos, Alberto Bolet, Pedro Pirfano, Urbano Ruiz Laorden, Theo Alcántara, Juanjo Mena, Günter Neuhold eta 2015etik Erik Nielsen.
BOSek etapa ezberdinak bizi izan ditu, bere birengatik penintsulako iparraldeko orkestratzat hartzen zen urteetatik hasi eta San Petersburgon edo Tokion, Japonian biran, eta Frantziako jaialdi garrantzitsuetan aldizka aritzera eraman duen nazioarteko hedapen berrieneraino. 2019ko urtarrilean, Omango Royal Opera Housen eskainitako «Madama Butterfly» antzezpenetan parte hartu zuen.
2012an bere 90. urteurrena ospatu zuen Schönbergen Gurreliederrak interpretatuz, Günter Neuholden zuzendaritzapean, kontzertuak zuzenean grabatu ziren eta Thorofonek CDan editatuta ere.
Orkestraren egoitza den Euskalduna Jauregian egiten duen kontzertu-denboraldi erregularraz gain, BOSek ganbera-musikako denboraldiak eskaintzen ditu Bilbon eta Bizkaian, lan pedagogiko garrantzitsua Kontzertu didaktikoen eta En familia delakoen bidez, eta musikaren bidez gizarteratze-jarduerak garatzen ditu. OLBEren operetan parte hartzen du aldizka fosoko orkestra gisa, eta lankidetza-ildoak mantentzen ditu Guggenheim Museoarekin, Bilboko Arte Ederren Museoarekin, Deustuko Unibertsitatearekin eta Bilboko Arriaga Antzokiarekin batera.
Bere katalogo diskografikoaren barruan, BOSek euskal musikaren bilduma interesgarria egin du Naxosentzat, Arambarri, Guridi, Arriaga, Isasi, Usandizaga, Sarasate eta Escuderori eskainia. J. Rodrigo eta T. Takemitsu konpositoreen lanak ere grabatu ditu EMI JAPAN disketxerako, Kiyoshi Shomura gitarrista japoniarrarekin eta Juanjo Mena maisuaren zuzendaritzarekin.
BOSen jarduera bere zale ugarien laguntzari eta Bizkaiko Foru Aldundiaren eta Bilboko Udalaren ekarpenei esker garatzen da.
Esan dezakegu abenduko datorren astea “Amancio Pradaren astea” izango dela BOSen denboraldian. Joan den denboraldian ezin izan zen gurera etorri, COVIDak eragindako murrizketak zirela eta. Aurtengoan, ordea, bere musikaz gozatu ahal izango dugu, ez bakarrik denboraldi sinfonikoan, baita ganberakoan eta BOSek eta Deustuko Unibertsitateak antolatutako solasaldi batean ere.
Astelehenenean gurekin egongo da ganberako denboraldian “solista handiak errezitalean” izeneko saioan, Teresa Valente gure txelo solistarekin batera.
Asteartean “Kantu Espirituala” izeneko solasaldian hartuko du parte. Deustuko Unibertsitateko areto nagusian izango da 18:00etan (doako sarrera, edukiera bete arte).
Ostegunean eta ostiralean gure denboraldi sinfonikoaren parte izango da eta Ondarretako abesbatzarekin batera “Joan Gurutzekoaren Kantu espirituala” interpretatuko du. Víctor Pablo Pérezek zuzendutako programa da, non, halaber, César Francken “Sinfonia Re minorrean” ere interpretatuko duten.
Larunbat honetan gure Denboraldiko bosgarren egitaraua ikusteko aukera emango diegu Euskalduna Jauregira joan ezin duten pertsona guztiei. Kontzertuaz gozatzeko aukera izango dute, agertokiaren erdian “kokatuta” eta gure musikariek inguratuta baleude bezala.
BOSen eta Fair Saturday Fundazioren arteko lankidetzari esker, osteguneko 12.00erako kontzertuaren 360º-ko grabazio honek, interpretazioa etxetik disfrutatzea ahalbidetzen du eta momentu bakoitzean nahi duzuen ikuspuntua aukeratu, orkestraren erdian bazeundete bezala, musikariak eta zuzendaria ikusteko biratuz.
21:00ean hasiko da kontzertuaren emanaldia, eta gure YouTubeko orritik jarraitu ahal izango da. Bertara errazago sartzeko, lotura zuzenak egongo dira gure Facebook eta Twitterreko orrietan.
Proba ezazu gure orkestraz gozatzeko modu berri hau.
txearen Sagarapena, Obertura Op. 124
Hitzaurre Bi, piano eta orkestrarako kontzertua
8. sinfonia Fa Maiorrean Op. 93
Alfonso Gómez, pianoa
Erik Nielsen, zuzendaria.
.
Dur: 60’ (aprox.)
Philippe Quint biolin-jotzaile bakarlariak jakinarazi berri duenez, osasun-arazoak direla-eta, ezingo du gaurko aurreikusita zegoen BOSen Ganbera Denboraldiko kontzertua eskaini
Bilbon, 2019ko otsailaren 4an
Philippe Quint biolin-jotzaileak bertan behera utzi berri du arratsalde honetan bertan, 19:30ean, eskaintzekoa zen BOSen Ganbera Denboraldiko ganbera-kontzertua.
Kontzertua bertan behera geratu da artistaren osasun-arazoen ondorioz, artistak berak Bilbao Orkestra Sinfonikoari jakinarazi dionez.
Bai biolin-jotzaileak (joan den ostegunean eta ostiralean Denboraldi Sinfonikoaren egitarauan parte hartu zuen) bai Orkestrak berak kontzertua bertan behera geratu izana sentitzen dute, eta barkamen zintzoenak helarazten dizkiete errezitaldira joatea pentsatuta zuten entzuleei.
Sarreren zenbatekoa itzuli egingo da, eskuratu ziren bide beraren bitartez. Informazio gehiagorako, gure bulegoetara jo dezakezue bihartik aurrera.
BOSen bulegoen ordutegia: 09:00etatik 14:00etara.
Telefonoa: 94 403 52 05
Musikaz Biziz
4 tailer musikal haurrekin, BOSen entseguetarako Aretoan
Tailer hauen helburua da haurren sormen-gaitasuna suspertzea musika-jardueraren bitartez; izan ere, beraiek izango dira, inguru familiarrean, euren musiken protagonista eta sortzaileak.
Alaitz Zabalo Gidoia eta zuzendaritza
Irantzu Pérez Laguntzailea
4 – 8 urte
16 abendua (euskera)
3 otsaila (castellano)
17 de martxoa (euskera)
12 de maiatza(castellano)
Tailer bakoitzaren prezioa neska/mutikoko:
– Orokorra 4 €
– BOSeko abonatuak 3 €
Larunbat goizetan, 11:30etan
Iraupena, gutxi gorabehera: 75’
Gehienez 25 neska-mutiko, tailer bakoitzeko
Izen-ematea, 944 035 205
BOSek Musika-Música 2017 jaialdian eskainiko dituen kontzertuetan, II biolinen ataleko lehenengo atrilean izango da noizbehinka gurean gonbidatu gisa izaten dugun musikari bat: Vicente Cuevas.
Baina oraingoan, BOSera egindako bisitak oso balio berezia dauka: BOSeko gainerako kideekin batera, Mahler eta Dvorák interpretatuko ditu, eskuetan harribitxi mitiko bat duela: 1691ko Antonio Stradivari “Auer” biolina.
Instrumentua Roger eta Huguette Duboisek laga diote, Partita Shoah Biolin Solorako eta Tenplu Sakratua obra grabatzeko. Duboistarrak Canimex Taldearen jabeak dira, eta Quebecen (Kanada) dute egoitza. Holokaustoaren oroimenari eskainitako diskoa da; helburu bakar horrekin egiten den lehen lana da. Musika Jorge Grundmanena da; izan ere, musikari madrildar horren aitona-amonak Varsoviako ghettoan hil zituzten naziek. Obra horretako mugimendu bakoitza kontzentrazio-eremu eta ghetto bakoitzari eskainita dago.
Apirilean aurkeztuko den diskoa grabatu ondoren, Vicente Cuevasek biolin hori erabili ahal izango du hainbat hilabetetan. 1691ko Antonio Stradivari “Auer” biolinak izen hori dauka, zeren, tradizioari jarraiki, 300 urteko instrumentu paregabe horiei beren jabe edo erabiltzailerik ospetsuenaren izena jartzen zaie. Leopold Auer biolin-jotzaile juduarena izan zen aipatutako biolina. Errusiako eskolaren aitzindaria izan zen, eta, gainera, XX. mendeko biolin-jotzaile judu handi askoren irakaslea ere izan zen.
Bilbon lehen aldiz gozatu ahal izango dugu bere soinuaz, BOSek Musika-Música programaren barruan eskainiko dituen hiru kontzertuetan: Gustav Mahlerren 2. sinfonia (osteguna eta larunbata) eta Dvoráken Biolontxelorako kontzertua (larunbata).
